ameen

شرعی اصول ھے کہ ” لا عقوبۃ اِلۜا بالتجریم ،ولا تجریم اِلۜا بالنص ” کوئی سزا نہیں دی جا سکتی جب تک کسی کو مجرم ثابت نہ کر دیا جائے،اور کوئ مجرم ثابت نہیں کیا جا سکتا جب تک کوئی ایسا قانون نہ بنا دیا جائے جس کے کسی ارٹیکل یا سیکشن کی خلاف ورزی کو جرم کہا جا سکے ھر فرض ،واجب اور مستحب بصیغہ امر ھی دیا جاتا ھے کہ یہ کرو اور یہ نہ کرو، جس حکم کی خلاف ورزی پر کسی سزا کا تعین نہ کیا جائے وہ حکم کی بجائے نصیحت کہلانے کی زیادہ حقدار ھوتی ھے،،مثلاً یہ سہولت بھی آپ کوبصیغہ حکم ھی دی گئی ھے کہ جمعے کی نماز کے بعد زمین میں بکھر جاؤ اور جا کر اللہ کا فضل ڈھونڈو ،، اب یہ بکھرنا اور روزی تلاش کرنا فرض بھی قرار دیا جا سکتا تھا،، مگر یہ صرف سہولت قرار پایا اور آپ کی مرضی پر چھوڑ دیا گیا ،حکم شرعی الفاظ کو نہیں کہا جاتا بلکہ حکم شرعی ان الفاظ سے مترتب اور متشرح  نتیجے کو کہا جاتا ھے،،علماء میں اختلاف  الفاظ پر نہین بلکہ حکم کی قسم پر رھا ھے کہ یہ حکم فرض ھے یا واجب یا مستحب ؟ پھر اس کو سمجھنے کے لئے اصول بنائے گئے کہ جس حکم کی خلاف ورزی پر دنیاوی سزا رکھی گئی ھے، وہ فرض ھے اور اس کی خلاف ورزی حرام ھے، وغیرہ وغیرہ ،، قرآنی احکامات بھی اسی اصول کی بنیاد پر تقسیم کیئے جاتے ھیں،،ایک وہ احکامتِ ربانی جن کی خلاف ورزی پر کوئی نہ کوئی دنیاوی سزا متعین کر دی گئی ھے،، اور جب آپ ایک دفعہ قانون کے تحت جرائم اور سزا کی کوڈیفیکیشن کر دیتے ھیں تو اب آپ اپنی مرضی سے اسے نہیں چھیڑ سکتے کہ جب چاھا جو چاھا سزا دے دی ،،بلکہ سزا بدلنے کے لئے جرم کی دفعہ بدلنی پڑے گی ! شراب نوشی کی دفعہ کے تحت زیادہ سے زیادہ 40 کوڑے مارے جا سکتے ھیں ،، مگر اھلِ عراق اس بلا کے شراب نوش تھے کہ یہ سزا ان کے لئے کوئی اھمیت نہیں رکھتی تھی ، شراب نوشی کے واقعات کی کثرت پر گورنر نے کیس دارالخلافۃ ،یعنی مدینے بھیج دیا،، عمر فاروقؓ نے شوری بلائی اور پوچھا کہ کیا شراب نوشی پر سزا کو بڑھایا جا سکتا ھے،، جواب ملا کہ یہ نص ھے اس میں تبدیلی ممكن نهين ، البتہ حضرت علی ؓ نے تجویز پیش کی کہ شرابی جب شراب بیتا ھے تو جھوٹ بھی بولتا ھے تو کیوں نہ اس پر جھوٹ کی دفعہ لگائی جائے اور قذف کی سزا کا اطلاق کیا جائے،،سب کا اس پر اتفاق ھو گیا،یوں شراب نوشی پر قذف کی دفعہ لگا کر سزا کو 80 کوڑے کر دیا گیا،، آج کل شراب نوشی پہ 80 کوڑوں کی سزا شراب نوشی کی دفعہ نہیں بلکہ قذف کی دفعہ کے تحت دی جارھی ھے، اسی طرح قرآن میں زانی کی سزا 100 کوڑے ھی ھے اور دفعہ تبدیل کئے بغیر اس سزا کو نہیں چھیڑا جا سکتا مگر نبی کریمﷺ نے اپنے اختیار کو استعمال فرماتے ھوئے فساد فی الارض کیدفعہ کے تحت رجم فرمایا ھے اور پھر اس مین شادی شدہ یا غیر شادی شدہ کی تحقیق اسی وجہ سے نہیں کی کیونکہ دفعہ تبدیل ھونے کے بعد اس کی ساری شرائط تبدیل ھو گئی تھیں  !جب کہ احکامات کی ایک قسم وہ ھے جن کی خلاف ورزی ایک غیر اخلاقی حرکت تو ھے مگر ان کی کوئی دنیاوی سزا مقرر نہیں ھے،، مثلاً سورہ الحجرات کے اخلاقی احکامات،مرد مردوں کا اور عورتیں عورتوں کا تمسخر نہ اڑائیں،، ایک دوسرے پر الزام تراشی نہ کریں،،برے لقب نہ رکھیں،، ایک دوسرے کے اعمال و افعال کی جاسوسی نہ کریں، سوء ظن سے کام نہ لیں اور نہ ایک دوسرے کی غیبت کریں،، ان میں سے انسان اگر کسی کا ارتکاب کر لے،جو کہ ھم بدقسمتی سے روزانہ کی بنیاد پر کرتے ھیں،،تو اس ارتکاب کی سزا کوئی نہیں رکھی گئی، آپ کسی کی کھوج کرید کریں،، کسی کو گنجا کہیں،یا غیبت کریں تو ان افعال کو اخلاقی کمزوری تو کہا جائے گا ،مگر جرم نہیں کہلائے گا،کیونکہ جرم عقوبت کو سزاوار ھے،، اور ان کی عقوبت کوئی نہیں،، تکبر بری چیز ھے مگر اس کی سزا کوئی نہیں کہ پولیس آ کر اپ کا دروازہ کھٹکھٹائے کہ باھر نکلو تمہارے بارے میں رپورٹ ملی ھے کہ آج تم اکڑ کر چلے ھو اور تمہارا تہہ بند بھی ٹخنوں سے نیچے تھا،، گویا یہ ایک اخلاقی کمزوری ھے،، پولیس کے دائرہ اختیار میں آنے والے امور میں سے نہیں،، جن جرائم پر سزا ھے وہ قانون کے تحت آتے ھیں اور جن پر سزا نہیں ھے اور پولیس اس پر ایکشن نہیں لے سکتی ان احکامات کو آداب میں شمار کیا جاتاھے ! جن اخلاقی کمزوریوں پر دنیاوی سزا کا اطلاق نہیں کیا گیا، ان کی آخرت کی عقوبت بہت سخت رکھی گئی ھے،،اور یہ معاملے کو بیلنس کر دیتی ھے ،،لوگ خوفِ آخرت سے ان کو ترک کردیں،اسی حکمت کے مدِنظر بعض معمولی سمجھے جانے والی اخلاقی کمزوریوں پر حیران کن حد تک سخت سزا رکھی گئی ھے،، مثلاً ایک غیبت 36 زنا سے بھی زیادہ بدتر اور مردہ بھائی کا گوشت کھانے کے مترادف ھے،، سود کا ایک درھم، ماں سے بدکاری کے برابر ،، چغل خور جنت کی خوشبو نہیں سونگھے گا،، متکبرین کو چیونٹیوں کی شکل مین پیدا کیا جائے گا اور وہ لوگوں کے پاؤں کے نیچے کچلے جائیں گے،، وغیرہ وغیرہ،، اگر پردے کے احکامات اخلاقی ھدایات نہیں ھیں تو ان کی خلاف ورزی پر کیا سزا رکھی گئی ھے ؟ اگر ایک عورت ان احکامات پر عمل نہیں کرتی تو اس کو دورِ نبویﷺ یا خلفاء راشدین کے زمانے میں کیا سزا دی گئی ،جبکہ خواتین کا بے پردہ نبیﷺ کے سامنے آنا ثابت ھے؟؟الٹا لونڈی پر یہ سختی کی گئی کہ وہ نماز میں بھی سر نہیں ڈھانپے گی،اور نہ بازار میں پردہ کر کے یا چادر لے کے چلے گی،،تا کہ آزاد عورت اور لونڈی کا فرق واضح رھے،، حضرت عمرؓ نے اپنے دورِ خلافت میں ایک عورت کو پردہ کر کے جاتے دیکھا تو پوچھا کہ یہ
کون ھے؟ جواب دیا گیا کہ یہ ام سلمیؓ ام المؤمنین کی لونڈی ھے،تو آپؓ نے اس کو ڈانٹ کر سرِ بازار اس کا پردہ اتروایا اور کہا کہ اگر ام المومنیؓن کا احترام ملحوظِ خاطر نہ ھوتا تو میں تمہیں سزا دیتا، اور پھر آپؓ نے ام المومنین کو پیغام بھیج کر استدعا کی کہ اپنی لونڈیوں کو پردے سے روکیں ورنہ وہ ان کے لئے سزا مقرر کر دیں گے،، گویا کسی زمانے میں آزاد عورت اور لونڈی میں فرق کا پیمانہ جسے کوئی بازار میں بھی چیک کر سکتا تھا صرف پردہ ھی تھا،، آج کل تھیوری کے لحاظ سے ماشاء اللہ ساری آزاد ھیں،لونڈی کا وجود ختم ھو چکا ھے، لیکن اس کا مطلب یہ بھی نہیں کہ ان احکامات کی اھمیت کوئی نہیں،  بلکہ ان کی خلاف ورزی پر اخرت کی سزا مستلزم ھے،، جس کا ڈراوہ باقاعدہ قرآن میں دیا گیا ھے ،،مگر چونکہ اس میں خطاب نبیﷺ کی بیویوں کو کیا گیا ھے لہٰذا اب دوسرا مغالطہ شروع ھوا کہ یہ احکامات صرف نبیﷺ کی بیویوں کو جاری ھوئے تھے ! اس مغالطے کی وجہ ایک دوسرا مغالطہ ھے،،اور وہ اللہ پاک کا طرزِ کلام نہ سمجھنا ھے !(جبکہ سورہ نور کے احکامات تو مومنات کا ذکر کر کے دیئے گئے ھیں) اللہ پاک جب کسی کو اسوہ قرار دیتا ھے تو پھربعض دفعہ اسی کو احکامات کا مخاطب بناتا ھے، جب سورہ بنی اسرائیل میں اللہ پاک نے اپنے احکامات کا رخ نبیﷺ کی طرف کیا تھا تو وہ اسی اصول کی بنیاد پر تھا، مثلاً سنگل صیغہ استعمال کرتے ھوئے اللہ پاک نے نبی کریمﷺ کو فرمایا کہ تیرا رب فیصلہ کر چکا ھے کہ تم اللہ کے سوا کسی کی بندگی نہ کرو اور والدین کے ساتھ اچھا سلوک کرو،، اگر تمہارے پاس ان میں سے کوئی ایک یا دونوں بڑھاپے کی عمر کو پہنچ جائیں تو تم ان کو نہ تو اف کہو اور نہ ان کو جھڑکو،اور ان کے ساتھ نرمی سے گفتگو کرو،، اب اس میں براہ راست نبیﷺ کو یوں مخاطب بنایا ھوا ھے،جیسے نبی کریمﷺ کے والدین ان کے پاس گھر میں بیٹھے ھوئے ھیں حالانکہ سب کو پتہ ھے کہ نبیﷺ کے والدین تو فوت ھو چکے تھے،، بالکل اسی اصول پر نبیﷺ کو قرآن میں بعض جگہ جو استغفار کے لئے کہا گیا ھے تو آپ کو بطور اسوہ خطاب کرتے ھوئے،امت کو حکم دیا  گیا ھے،، یہ ھی اسلوب پردے کے احکامت میں بھی نبیﷺ کی بیویوں کو مخاطب کر کے امت کی عورتوں کو احکامات دیئے گئے ھیں،، اب عورتیں اپنے اپنے احوال کے مطابق اللہ کے یہاں جواب دہ ھیں،، جو مجبوری کے عالم میں مکمل عمل نہیں کر پاتیں،اللہ پاک رحیم کریم ھے ،مگر بہرحال چہرے ،ھاتھوں کی ہتھیلیوں اور پاؤں کے ننگا رکھنے پر دور نبوی سے لے کر تا ایں دم کہیں بھی کسی سزا کا تعین یا اطلاق نہیں کیا گیا، جو پردے کے استحباب کو مستلزم ھے ! واللہ اعلم بالصواب  

    اب یہ کہنا کہ اختلافی باتیں چھوڑیں اور اتحادی باتیں پکڑیں تو جناب جو قومیں وحی کو چھوڑ کر لغویات میں کھو جاتی ھیں وہ اتفاق اور اتحاد سے سزا کے طور پر محروم کر دی جاتی ھیں،، ھم نے مدارس سے لے کر روزمرہ زندگی کے عملی معاملات تک تو مقام وحئ الہی کو دیا ھے ٹھیک وھی مقام اللہ کی نگاہ میں ھمارا ھے ،، ھم نے بھی کتاب اللہ کو صرف پڑھنے تک محدود کر دیا اور ثواب کمانے تک محدود کر دیا ،، اور ساری دلچسپیاں دیگر مشاغل کو دے دیں،،جس طرح یہود نے کیا تھا،، نتیجہ یہ ھے کہ تلمود تو محفوظ ھے،، تورات ندارد ،، ھمارے علماء ولا تکونوا کالتی نقضت غزلہا من بعد قوۃ انکاثا ،،کا مصداق بن گئے،، علوم ظاھری سے فراغت کے بعد جو کہ اصلاً نبوی امانت تھی پھر اس امانت کا بیڑہ غرق کرنے اور محنت سے کاتے گئے سُوت کو اپنے ھاتھوں ٹکڑے ٹکڑے کرنے کے لئے علوم باطنیہ کی طرف متوجہ ھوتے ھیں،،اور پھر ان حجروں مین ڈاکٹر ھائیڈ اینڈ جیکل تیار ھوتے ھیں،، ایک عالم منبر پر ھمیں بتاتا ھے کہ سب کچھ اللہ کی مرضی سے ھوتا ھے،کوئی کچھ نہیں کر سکتا،،وہ جس کا نام محمد ﷺھےکسیچیزپرتصرفنہیںرکھتا،اللہپاکنےقرآنمیںدو جگہ صاف صاف فرما دیا ھے کہ و ان یمسسک اللہ بضرٍ فلا کاشفَ لہ الۜا ھو ، اور یہ کہ نبی ﷺنےیہودیوں کے سوال کے جواب مین ان شاء اللہ کہے بغیر کہہ دیا کہ کل جواب دوں گا پھر وہ کل لگ بھگ ایک ماہ تک محیط ھو گئی،آسمان سے وحی رک گئی،،اور جب شروع ھوئی تو پہلی اصولی بات کہی گئی کہ ” ولا تقولن لشئٍ انی فاعل غداً الا ان یشاء اللہ،،آئندہ خبردار کسی چیز کے بارے میں ان شاء اللہ کہے بغیر یہ کبھی مت کہنا کہ میں یہ کل کر دوں گا،،، یہ ھی عالم جب خود کانگرس کے جلسے میں شریک ھوتا ھے،تو ایک نئی ھی داستان رقم کرتا ھے ،، ساون کا مہینہ ھے بادل گر گر کر آ رھے ھیں اور کانگرس پریشان ھے کہ بارش کی صورت میں جلسہ درھم برھم ھو جائے گا،،اسی سراسیمگی کی حالت میں ایک بکھرے بالوں والا درویش نما ادمی کہیں سے نمودار ھوتا ھے،،اور کہتا ھے،، ۔۔۔۔۔  سے کہہ دو کہ اس علاقے کا ذمہ دار ( قطب ) میں ھوں اگر بارش روکنی ھے تو بات کرے ! مرید خیمے کے اندر گیا،،جناب مدنی صاحب کروٹ کے بل ھاتھ گال کے نیچے ٹیکے لیٹے تھے ،، مرید نے درویش کی بات بیان کی ،، ۔۔۔۔۔۔۔۔ صاحب جو خود قطبِ دوراں تھے، جلال میں آ گئے اسی حالت مین لیٹے لیٹے ایک خاص کیفیت میں مرید سے فرمایا،، جاؤ اسے بتا دو بارش نہیں ھو گی ، اور بارش نہ ھوئی ،، خدا را بتائیے کیا یہ دو دیوتاؤں کی لڑائی نہیں تھی ؟ اس میں کہیں اللہ نظر آیا ھے،، نبی ﷺانشاءاللہنہکہےتواللہنبیکیباتپوری نہ ھونے دے ،،اور حسین احمد ایک خاص کیفیت میں ان شاء اللہ کہے بغیر کہہ دے کہ جا اؤؤؤؤؤئے بارش نہیں ھو گی،،اور اللہ بارش روک لے ؟؟ یہ ایک قطب کی بات نہیں، ھمارا ھر بزرگ دیوتاؤں کی سی شکتیاں رکھتا ھے۔۔،، یہ منبر پر بتاتے ھیں کہ بارش نہ ھو تو نبیﷺنمازاستسقاءپڑھاکرتےتھے،،مگرخودیہ اپنی سوانح عمریوں میں لکھتے ھیں کہ ھمارے فلاں صاحب تو اس قدر صاحب تصرف تھے کہ پیسوں سے بارش بیچا کرتے تھے،،یعنی اتنے پیسے لنگر میں جمع کرا دو ،،اور کل اتنے بجے بارش ھو جائے گی،، خدایا تیرے یہ سادہ دل بندے کدھر جائیں ؟ کہ درویشی بھی عیاری ھے سلطانی بھی عیاری ! قران اور حدیث والی توحید عوام کی توحید ھے ،ان خواص کی توحید بھی کچھ اور ھی ھے ! اور خاص الخواص کی توحید تو اللہ کی پناہ ! یہ جبرائیل کی شراکت پسند نہیں کرتے اور اسے شرک گردانتے ھیں،، ابنِ عربی جس کا فرمایا ھمارے صوفی علماء کے لئے حق الیقین ھوتا ھے ،لکھتا ھے ” ھم نبی اور نبوت کو اعزازاً اور احتراماً مانتے ھیں کیونکہ ھمیں اس کا حکم دیا گیا ھے ،، ورنہ ھم نبیﷺ کے محتاج نہیں،،ھم براہ راست احکامات وھاں سے لیتے ھیں جہاں سے جبریل لیتا ھے ” ان کی نگاھیں ھر وقت لوح محفوظ پر رھتی ھیں اور یہ تقدیروں کے بدلنے پر قدرت رکھتے ھیں،، اگر سورہ انبیاء نبیوں کی بے بسی کی داستان سناتی ھے ،،ان کا بلک بلک کر رب سے مانگنا،،کانوا یدعوننا،،وہ ھمیں سے مانگ مانگ کے لئے لیا کرتے تھے،چاھے اولاد ھو یا صحت،، نجات ھو یا ھدایت ،، تو گھبرائیں نہیں ،،اسی لئے تو ولایت نبوت سے افضل ھوتی ھے، کیونکہ نبی کا رخ مخلوق کی طرف اور ولی کا رخ اللہ کی طرف ھوتا ھے،، یہ ھے ھندوستان کا اسلام ( اسلام کا ھندی سروپ ) اور یہ ھیں ھمارے علماء ،،جن کے قول و فعل کا تضاد روزِ روشن کی طرح عیاں ھے،، ان کا منبر کا قول کچھ اور ھے ،، حجروں کا فعل کچھ اور ھے ! انسان جب چلہ کشی کے نتیجے میں آوازیں سنتا اور صورتیں دیکھتا ھے( تنہائی میں جب چلہ کشی کی جاتی ھے تو انسانی ذھن یکسانی سے اکتا کر اپنی دلچسپی کے لئے تصویریں اور آوازیں تخلیق کرتا ھے،، جنہیں سن کر اور دیکھ کر ان کو اپنے تصوف کے حق ھونے کا علم الیقین حاصل ھو جاتا ھے، پھر قرآن ان کا کچھ نہیں بگاڑتا،ظاھر ھے انکھوں دیکھے کو کون جھٹلا سکتا ھے؟ اس لئے یہ دلیل سے زیادہ کہتے ھیں کہ کر کے دیکھو،، اور پھر اپ بھی اسی راہ سے گزر کر علم الیقین پا لیتے ھو ! مین نے پہلا چلہ تقریبا ً ساڑھے نو یا دس سال کی عمر میں کیا تھا اور پھر اس تصوف کی دنیا کا ھر پتھر الٹ کر رکھ دیا،، کبھی میکدے سے گزرے،کبھی ھم حرم سے گزرے،،تیرے در پہ پہنچنے تک بڑے پیچ و خم سے گزرے،،،، مگر مجھے پتہ ھے یہ انسان کی نفسانی قوتوں کا کھیل ھے ،،اس کا دین کے ساتھ نہیں ریاضت کے ساتھ تعلق ھے،،اور یہ ھر مذھب والا اور بے مذھب حاصل کر سکتا ھے،، جس طرح کرکٹ کا تعلق محنت اور پریکٹس کے ساتھ ھے، مذھب کے ساتھ نہیں،،اسی طرح اس یوگا کا تعلق بھی پریکٹس کے ساتھ ھے مذھب کے ساتھ نہیں ،،مگر یہ بات جتنی آسانی سے آج سائنسی طور پر ثابت کی جاسکتی ھے،،گزرے کل تک اسے اس طرح ثابت کرنا ممکن نہ تھا لوگ اسے اپنی کرامت سمجھتے رھے اور ایمان ضائع کرتے رھے،، اس یوگا یا تصوف کی ایک ایک مشق اور اس کے اثرات کی سائنسی توجیہہ کی جا سکتی ھے،،حبسِ دم سے لے کر تسبیح یا مالا تک،،کہ ان کا سائنٹیفک آوٹ پٹ کیا ھے،، ( ربنا لاتزغ قلوبنا بعد اذ ھدیتنا ،، آمین یا رب العالمین) 

لیڈیز اینڈ جنٹلمین ! جس شخص نے دیہاتی زندگی کا مزہ نہیں چکھا،سمجھ لیں کہ وہ آدھا پیدا ھوا ھے اور اس زندگی کے متعلق اس کا علم بھی آدھا ھے اور زندگی کی طرف اس کا رویہ بھی لولا لنگڑا اور پولیو زدہ ھے، دیہات کی زندگی اپنے اندر سارے رنگ رکھتی ھے ،دیہاتی زندگی کی اصلیت کی اس سے بڑھ کر دلیل کیا ھو گی پرانے زمانے میں شہروں میں کوئی بھی پیدا نہیں ھوتا تھا،بلکہ لوگ دیہات میں پیدا ھو کر شہر میں جاتے تھے اور شہر بناتے تھے، اللہ پاک نے اپنے دین کے لئے بھی بڑے بڑے ترقی یافتہ شہر چھوڑ کر ایک دیہاتی بستی کو منتخب فرمایا،، دیہات کے لوگ بڑے کھرے ھوتے ھیں،” جب پیار کیا تو پیار کیا،جب نفرت کی تو سروس کی ” دیہات کا ھی مقولہ ھے، وھاں دل میں رکھنے کا رواج ھی نہیں فوراً سر بازار بھڑاس نکال لی جاتی ھے،جس کا فوری فائدہ تو یہ ھوتا ھے کہ دل پر بوجھ نہین رھتا جسکی وجہ سے دیہات کے لوگ صحتمند ھوتے ھیں،دوسرا فائدہ طویل الامد ھوتا ھے کہ سند بڑی آسانی سے مل جاتی ھے کہ کس کے ساتھ کیا ھوا تھا اور کب ھوا تھا! بدنام ِ زمانہ چینل جیو شپروں میں تو بہت بعد میں آیا ھے،جبکہ دیہات میں یہ بہت پرانا ھے،دیہاتی جیـــو نیوز کی نشریات میں لؤڈ شیڈنگ کبھی مخل نہیں ھوتی، بلکہ ایک صاحب کی چڑیا کی خبر کے مطابق تو یہ بجلی دریافت ھونے سے بھی پہلے کی ایجاد ھے ! دروغ بر گردنِ راوی اتنی گواھی تو ھم بھی دیتے ھیں کہ ھمارے گاؤں میں بجلی 1980 کی دھائی میں آئی ھے،مگر ھم اس دیہاتی چینل کی نشریات 1960 کی دھائی سے سنتے آ رھے ھیں،، بلکہ وہ نشریات تو اتنی ھمہ جہتی اور ذو معنی ھوتی تھیں کہ ھم آج تک ان کاترجمہ اور تشریح کرنے کا حق ادا نہیں کر پا رھے ! دیہات میں ھر فرار ھونے والی لڑکی ماں کو بتائے یا نہ بتائے ،مگر باقی پورے گاؤں کی شادی زدہ یا کنواری لڑکیوں کو ضرور اپنی کہانی بتا کر جاتی ھے، جس سے لڑکی کی ماں کا متفق ھونا اسی طرح ضروری نہیں جسطرح ایڈیٹر کا مراسلہ نگار کی رائے سے اتفاق ضروری نہیں ھوتا،، بلکہ بعض خواتین تو لڑکی کی ماں کو لعن طعن بھی کرتی ھیں کہ تم کسی ماں ھو کہ تمہاری بیٹی ھمارے ساتھ دکھ سکھ بانٹتی پھرتی تھی اور تمہیں خبر تک نہیں ! جانے سے پہلے وہ رستے میں ملنے والی ھر لڑکی کو سوزوکی میں سے ھاتھ نکال کے سلام بھی کر کے جاتی ھے،، بلکہ جو لڑکی رستے میں نہ ھو وہ اس سلام کو مدرسے میں بھی وصول کر لیتی ھے ،جسطرح اسلام آباد اسٹوڈیو سے شیخ رشید ،لقمان مبشر کو جوائن کرتا ھے،، کسی حادثے میں مرنے والا چاھے وہ ٹریکٹر کے نیچے آ کر شہید ھو یا عشق میں ناکامی پر گولیاں کھا لے یا ڈوب کر مرے،، مرنے سے ایک دن پہلے بلکہ ایک گھنٹہ پہلے گاؤں کے سارے کنوارے اور شادی زدہ بوڑھے،سب سے ضرور ملتا ھے،یا کم از کم سب کا دعوی یہ ھی ھوتا ھے،اور ان سب کو اپنی کہانی اس شرط پر سناتا ھے کہ وہ اس کے مرنے کے بعد بیان کی جائے، یہ الگ بات ھے کہ ھر بندے کے پاس اس کہانی کا اپنا ورژن ھوتا ھے اور ھر بندہ اس کو کھرے سچ کے طور پر پیش کرتا ھے ! دیہات کے لوگ بڑے بامروت ھوتے ھیں، ھر کسی کے دکھ درد میں ضرور شریک ھوتے ھیں،اگرچہ اس شراکت کی زیادہ تر دلچسپی خبر بریک کرنے کی نیت سے ھوتی ھے،ایک تعزیتی مجلس میں جسے دیہاتی زبان میں "پُھہڑی ” کہتے ھیں ھمیشہ مرنے والے کی تعریف کی جاتی ھے،بلکہ اس کے وہ وہ کارنامے بیان کیئے جاتےھیں کہ مرحوم کے لواحقین بھی شرما جاتے ھیں،، ایک صاحب فوت ھو گئے، اب ان کو سارا گاؤں جانتا تھا کہ انہوں نے زندگی میں کسی کا بھلا نہ سوچا اور نہ کرنے کی کوشش کی،، ساری پھُہڑی سکتے میں بیٹھی تھی اور پِن ڈراپ سائلینس کا سا سماں تھا کہ ،، نائی کی غیرتِ ایمانی اور مروتِ دیہاتی نے انگڑائی لی،کہنے لگا ھر بندے کو اپنی رائے رکھنے کا حق حاصل ھے،جتنے منہ اتنی باتیں،کوئی کسی کی زبان تو بند نہیں کر سکتا مگر میں ایک بات جانتا ھوں کہ مرحوم کی شیو بڑی نرم تھی، نرم کیا تھی بلکہ ملائی تھی ملائی،، مجھے تو یوں لگتا تھا مکھن میں استرا مار رھا ھوں،، اب جس کی شیو اتنی نرم تھی اس کے دل کا کوئی اندازہ کر سکتا ھے کہ وہ کتنا نرم ھو گا؟ اور جس کا دل نرم ھوتا ھے اس کی جان بھی بڑی آسانی سے نکلتی ھے ،یعنی عزرائیل کا استرا بھی ملائی کی طرح چل جاتا ھے، نائی کے اس قیاس پر پوری مجلس عش عش کر اٹھی،اور مرحوم کے بیٹے تو احسان مندی میں اسے دور تک رخصت کرنے گئے کہ مبادا رائے کو تبدیل ھی نہ کر لے ! اس کو کہتے ھیں کہ انسان کی سوچ مثبت ھو تو مثبت دلیل بھی مل ھی جاتی ھے ! شہر والوں سے گزارش ھے کہ پہلی فرصت میں قریب ترین دیہہ میں اپنی بکنگ کرا لیں،،کم از کم مرنے کے بعد نیک نامی کا سرٹیفکیٹ تو آسانی سے مل جاتا ھے،، 

بریلویت اور دیوبندیت میں فرق کہاں ھے! الحمدُ للہ و کفی والصلوۃ والسلام علی اشرف الانبیاء والمرسلین امۜا بعد ! ادارہ اخوان المومنین نے "العطایا النبویۃ ،الفتاوی الرضویۃ ” کی جلدِ دھم کا پہلا نصف پبلش کروایا ھے،،اس کو چھپوانے والے نے اس کے دیباچے میں  لکھا  ھے کہ مروجہ بریلویت بذاتِ خود احمد رضا بریلوی کے فتاوی کے خلاف اور ان کی بدنامی کا باعث ھے،، آج کے بریلوی کو نمونہ بنا کر جو گالی احمد رضا کو دی جاتی ھے وہ ایک ظلم سے کم نہیں ،، ولا تزرُ وازرۃ وزر اخری ” کے قرآنی اصول کے خلاف ھے ! اب ذرا پڑھئے  "کتاب ھذا کے مطالعے سے پہلے احقر باوجود جدی پشتی اھلِ سنت بریلوی ھونے کے” امام احمد رضا خاں بریلوی” سے متنفر ھو گیا ! اس کے ذمہ دار بریلوی بھائی ھی تھے،کیونکہ انہوں نے آپ کا تعارف ھی ایک نعت خوان اور بات بات پر کفر کا فتوی لگانے والے کی حیثیت سے کرایا تھا،، وہ اپنی بدکرداری و بے عملی کے لئے امام احمد رضا کے نام کو بطورِ ڈھال استعمال کرتے رھے تھے- انہوں نے آپ کے اُن ھی خطوط(رسائل) کی اشاعت پر زور دیا جن میں فاتحہ و درود،تیجہ،چالیسواں وغیرہ وسائل کا بیان تھا،جن سے بلا محنت و مشقت ان کی روٹی میں وسعت ھو سکتی تھی – ھمارے واعظ اور پیر حضرات کی علمی و عملی حیثیت بہت کمزور ھے،،وہ بیمارے دین کی دال بھی نہیں جانتے،دوسروں کو کیا سمجھائیں گے ! رسول اللہﷺ اور اولیاء اللہ رحمۃ اللہ علیہم اجمعین کے پاکیزہ منبر پر سچ سے زیادہ جھوٹ سے کام لیا جاتا ھے، اس بھولی بھالی قوم کو خوب بیوقوف بنا کر عقل و فکر سے عاری کر دیا گیا ھے،، محبانِ رسولﷺ کے پاکیزہ منبر پر وہ واعظ ھی کامیاب ھوتا ھے جو زیادہ جھوٹ بولے،،ٹھٹھہ مذاق کرے۔ ھنستا ھنساتا اور روتا رلاتا ھو ،، ھماری درسگاھوں میں بھی زیادہ اھمیت فنِ تقریر کو دی جاتی ھے،، بلکہ یوں کہیے کہ وہ فنکار اور گلوکار تیار کرنے کے کارخانے بن گئے ھیں ! موجودہ دور میں مقرر کے پاس اردو کی مولانا محمد بشیر کی بارہ تقاریر کا سیٹ۔۔مولانا محمد شریف نوری کی بارہ تقاریر،، مولانا نور محمد صاحب کی مواعظِ رضویہ کا سیٹ اور قاری محمد دین صاحب کا الخطیب کتابیں ھونی چاھئیں،، بس جناب خطیبِ اعظم،، مبلغ اسلام،یعنی صقلِ اسلام تیار ھیں،، یہ گروہ پورے ملک میں پھیلا ھوا ھے،،یہ لوگ اصولِ دین اور فروعِ دین سے نالکل بے پرواہ ھوتے ھیں،، ان کا نظریہ یہ ھے کہ یا رسول اللہ کہنا،،علی علی کرنا، یا غوث الاعظم کے نعرے لگانا ھی عبادت ھے،،یہ گروہ بہت خطرناک ھے ،یہ مسلمانوں کے قبرستانوں میں ڈیرے جما کر بیٹھ جاتے ھیں ،بھنگ ،چرس،افیون، بلکہ شراب تک پیتے ھیں ان لوگوں کو اگر کوئی ملامت کرے تو فوراً گستاخ رسول اور گستاخِ اولیاء کا واویلا کر کے اور بہتان لگا کر لوگوں کو اس کے خلاف بھڑکاتے ھیں،،نتیجۃ وہ بے چارہ بھاگنے پر مجبور ھو جاتا ھے یا جان سے ھاتھ دھو بیٹھتا ھے ،،پہلا اور تیسرا گروہ دراصل شیعہ کے زیادہ قریب ھے، ،، مخالفین ان دونوں گروھوں کو بھی بریلوی سمجھتے ھیں اور ان کی خرافات اور بدعات و بدکرداری دیکھ کر کہہ دیتے ھیں کہ بریلوی بدعتی ھیں،،، حالانکہ یہ حضرات بریلوی نہیں کیونکہ بریلوی وہ ھیں جو امام احمد رضا کی تعلیمات پر عمل پیرا ھیں،،اور احمد رضا ردِ بدعات میں دیوبندی اور اھلِ حدیث حضرات سے چند قدم اگے ھیں ! لیکن جب میں نے فتاوی رضویہ کی دسویں جلد کے نصفِ اول کا بالاستیعاب مطالعہ کیا تو وہ تمام شکوک و شبہات دور ھو گئے جو امام احمد رضا بریلویؒ کے خلاف میرے دل میں تھے،اس کتاب کے مطالعے کے بعد میں اس نتیجے پر پہنچا کہ دیوبندیوں اور بریلویوں مین اختلاف صرف چند متنازعہ عبارات کا ھے اس کے علاوہ اس کے علاوہ ان میں کوئی اختلاف نہیں ھے یعنی یہ جو شرک اور توحٰید کا راگ الاپا جاتا ھے،اس میں کوئی حقیقت نہیں ھے، دیوبندی بریلویوں سے بڑھ کر بریلوی اور بریلوی دیوبندیوں سے بڑھ کر دیوبندی ھیں،، دونوں کی فقہ اور امام ایک ھے،، دونوں کے مدارس مین پڑھائی جانے والی کتب ایک ھیں،، دونوں تصوف کے دل دادہ ھیں اور پانچوں سلاسل دونوں مين موجود ھیں،نقشبندیہ،سہر وردیہ،چشتیہ وغیرہ سلاسل میں سب کے بزرگ ایک ھیں،،لطائف اور مشقیں ایک ھیں،، یہانتک کہ جتنے اختیارات دیوبندی قطب اور غوث کے ھیں  وھی اختیارات بریلوی قطب کے ھیں،، بلکہ بریلوی عموماً پرانے قطبوں  اور بزرگوں سے کام چلا رھے ھیں،جبکہ دیوبندیوں کے مدارس میں پڑھانے والا ھر مدرس قطب ھے،مثلاً شاہ ولی اللہ دہلویؒ اور ان کے سارے بیٹے،شیخ الہند، قاسم نانوتویؒ، انور شاہ کاشمیریؒ،احمد علی لاھوریؒ، عبدالقادر رائے پوریؒ،حسین احمد مدنیؒ، حاجی امداد اللہ مہاجر مکیؒ یہ سارے اپنے وقتوں کے قطب تھے،اور ان میں سے بعض جھٹ کسی ڈوبتے جہاز پر کسی کی پکار پر پہنچنے والے ،،بعض مرنے کے بعد کسی مناظرے مین خامشی سے پہنچ کر مناظر کے کانوں میں دلائل پھونکتے تھے اور بعض کسی کے سینے میں پائے جانے والے وسوسوں سے بھی آگاہ ھوتے تھے ( تفصیل دیکھنی ھو تو  حکایاتِ اولیاء کتاب دیکھ لیں،سستی بھی ھے اور ھر اسلامی بک شاپ کی روحِ رواں بھی ھے،اشرف علی تھانوی اس کے مصنف ومؤلف ھیں)،، دونوں فریق مردوں کی قبروں پر چلہ کشی سے استفادہ کرتے ھیں،، دونوں مردہ بزرگوں کے تصرف کے قائل ھیں،، دونوں فریق قطبوں اور غوثوں کے اختیارات کے چارٹ پر مکمل اتفاق رکھتے ھیں ! پھر توحید کیا ھے؟ اور شرک کیا ھے؟ دونوں میں موحد کون ھے
اور کیوں ھے؟؟ شرک اور توحید کا رونا اصل میں اپنے اپنے بزرگوں کی عبارات کا دفاع کرنا ھے،،اپنے بزرگوں کی خاطر نبیﷺ کی امت کو توڑ کر رکھ دیا گیا ھے،، اگر اپنے ان  بزرگوں کی تحریر میں پائی جانی والی سوء تعبیر پر مبنی چند عبارات کو نکال دیں یا کم از کم ان سے اعلانِ برأت کر دیں تو امت کے یہ دونوں دھڑے اتفاق کے ساتھ بہت ساری برائیوں کے خاتمے اور دینِ حنیف کے قیام و استحکام کے لئے اپنا کردار ادا کر سکتے ھیں،، اگر نبی کریم ﷺ کافروں سے امن کے لئے جناب حیدر کرارؓ کے دستِ مبارک سے  سےلکھا محمد رسول اللہ اپنے دستِ مبارک سے کاٹ کر محمد بن عبداللہ کر سکتے   ھیں تو امتِ مسلمہ کے دو عظیم دھڑے اس دین کی خاطر اپنے بزرگوں کی عبارات کو قرآن بنا کر کیوں بیٹھ گئے ھیں؟ ان عبارات کو نکالنے کے لئے ایک ضابطہ بنا لیا  جائے،،، مثلاً

ایسی عبارات جن میں اللہ پاک کی شرعاً یا عرفاً توھین کی گئی ھو !

ایسی عبارت جس میں کسی نبی کی توھین کی گئی ھو !

قران کی کسی آیت کی وہ تشریح جس میں نبی پاکﷺ کی ختمِ نبوت پر کو ئی زد پڑتی ھو ،،

،کسی آیت یا حدیث کی وہ تشریح جس سے اجماع پر زد پڑتی ھو !

ایسی عبارت جو کسی نص صحیح کے خلاف ھو

ایسی عبارت جو فریقین کے کسی بزرگ کی توھین پر مبنی ھو !

ایسی عبارت جس سے کسی ضرورتِ دینی کا انکار لازم اتا ھو !

ایسی عبارات جن میں شعائر اللہ کا مذاق اڑایا گیا ھو!

کسی بزرگ کی ایسی عبارت جس مین ملک وملت کا فائدہ کم اور نقصان زیادہ ھو !

ایسی عبارت جس مین فریقِ مخالف کو گالیاں دی گئی ھوں !

اگر ایسا ھو جائے تو یہ دونوں عظیم دھڑے مل کر شیعہ مجاوروں سے مزاروں کا قبضہ چھڑوا کر 90٪ قباحتوں کا خاتمہ کر سکتے ھیں،،

    "این کاؤنٹر” (پیرس ریویو )دوسری جنگِ عظیم کے فوراً بعد دنیا میں کمیونزم کا سب سے بڑا نقیب بن کر طلوع ھوا،آفسٹ پیپر پر جدید ترین پرنٹنگ سسٹم کے تحت شائع ھونے والا یہ رسالہ پیرس کی بندرگاھوں ،ائیرپورٹس، اور ریلوے اسٹیشنز سے نکلتا اور پھر چند ھی روز میں دنیا بھر کے ٹی اسٹالز ، کافی شاپس اور شراب خانوں میں پہنچ جاتا،جہاں نہ صرف اس کی ایک ایک سطر کو الہام کے طور پر پڑھا جاتا، بلکہ ایمان کا درجہ دے کر اس پر فوراً عملدرآمد بھی شروع کر دیا جاتا! یہ سچ ھے کہ اگر ھم مارکسی نظریات،مارکسزم کے پیروکاروں کے حلیوں اور ان کے متشدد نظریات کی تاریخ کھود نکالیں تو ھمیں "این کاؤنٹر ” ھی ملے گا،جس نے پوری دنیا میں بھوک کو مضبوط ترین فلسفہ بنا دیا، یہ این کاؤنٹر ھی تھا جس سے متاثر ھو کر نوجوانوں نے بال بڑھا لئے ،غسل کرنا ترک کر دیا،مارکسی لٹریچر کو مقدس سمجھ کر ایک ایک حرف کو رٹ لیا، بیویوں کو طلاقیں دے دیں، اور بچوں کو "ان امیروں کو لوٹ لو” کا درس دینا شروع کر دیا! رسالے کے پیچھے کروڑوں روبل تھے، دنیا کے بہترین ترین مارکسی دماغ تھے،ماہر صحافی،انتہای زیرک نقاد اور دانشور تھے، لہٰذا اس زمانے میں اس سے بڑھ کرمعیاری،جامع اور پر اثر جریدہ دنیا میں کوئی نہیں تھا،معیار کا اندازہ اس بات سے لگایا جا سکتا ھے کہ سپینڈر۔ آڈن ، اور مارلو جیسے دانشور اس کے ایڈیٹوریل بورڈ میں شامل تھے، اس کے علاوہ ایک بین الاقوامی مجلسِ ادارت تھی،جو دنیا بھر سے موصول ھونے والے مضامین، تجزیوں اور تبصروں کا کڑی نظر سے جائزہ لیتی،انہیں مارکسی کسوٹی پر پرکھتی،زبان و بیان کی غلطیوں کی نشاندھی کرتی،، اعداد وشمار اور حقائق کی صحت کا جائزہ لیتی ،،تسلی کے بعد یہ مضامین مختلف ڈیسکوں پر چلے جاتے،جہاں اپنے وقت کے ماھرین،ان کا انگریزی میں ترجمہ کرتے، ان کی نوک پلک سنوارتے،اس کے بعد ایک اور شعبہ اس ترجمے کا جائزہ لیتا،اس میں پائی جانے والی جھول،سقم اور لفظی کوتاھیاں درست کرتا ،، آخر میں جب اشاعت کا مرحلہ آتا تو انتظامیہ انگریزی ٹیکسٹ کے ساتھ ساتھ اصل متن جو مختلف زبانوں میں ھوتا بھی چھاپ دیتی،تا کہ اگر ترجمے میں کوئی غلطی رہ گئی ھو تو قارئین خود اصل متن کو دیکھ کر اسے درست کر لیں،،اس کڑے معیار ،انتخاب اور عرق ریزی کے باعث ناقدین "این کاونٹر” کو وہ مقام دیتے جو خود شاید کارل مارکس اور لینن کو بھی حاصل نہیں تھا ! مگر تقریباً دو دھائیوں بعد یہ انکشاف ھوا کہ جسے دنیا کمیونزم کی ” بائبل” سمجھ رھی تھی دراصل سی آئی اے کا منصوبہ تھا اور امریکی خفیہ ادارے کے ھیڈکوارٹر کے ایک چھوٹے سے کمرے سے ڈپٹی سیکرٹری رینک کا ایک امریکی، دو کلرک اور ایک چپڑاسی ،چند فائلوں،ٹیلکس کے چند پیغامات، اور کچھ خفیہ ٹیل فون کالز کے ذریعے برسوں تک پوری اشتراکی دنیا کو بے وقوف بناتے رھے،ان کے نظریات میں زہر گھولتے رھے،یہانتک کہ کمیونزم کے ٹارگٹ ممالک میں مقامی سطح پر اس کے خلاف مزاحمت شروع ھو گئی ! عرصے بعد جب این کاؤنٹر پراجیکٹ کا چیف ثقافتی یلغار کے موضوع پر منعقدہ ایک سیمینار میں شرکت کرنے پیرس گیا تو شرکاء نے اٹھ کر اس کا استقبال کیا اور ھال دیر تک ان کی تالیوں سے گھونجتا رھا،، بوڑھے ریٹائرڈ امریکی نے ھیٹ اتار کر اور جھک کر سب کا شکریہ ادا کیا اور اپنی سیٹ پر بیٹھ گیا،،، پوچھنے والوں نے سوال کیا ” سر آپ نے یہ سب کچھ کیسے کر لیا؟ بوڑھے امریکی نے مسکرا کر مائیک کو چھوا اور جواب دیا،، ینگ مین ویری سمپل،، ھم نے کمیونزم کو اتنا کڑا،سخت اور غیر لچکدار بنا دیا کہ وہ لوگوں کے لئے قابل قبول ھی نہ رھا” ایک اور نوجوان اٹھا اور بوڑھے امریکی سے مخاطب ھو کر بولا،، لیکن سر جریدے کے سارے منتظمین تو بہت کومٹٹیڈ اشتراکی اور کمیونسٹ تھے،، اور جہاں تک ھماری معلومات ھیں ان کا سی آئی کے ساتھ کسی قسم کا کوئی رابطہ بھی نہیں تھا؟ امریکی نے قہقہ لگایا اور دوبارہ مائیک کو چھو کر بولا،،،، ھاں بے شک ھمارا این کاؤنٹر کی انتظامیہ ،اس کے ایڈیٹوریل بورڈ اور کمیونسٹ ورکرز کے ساتھ کوئی تعلق اور رابطہ نہیں تھا،،لیکن دنیا کے مختلف کونوں سے اس تک پہنچنے والے مضامین کو لکھنے والے ھمارے ھی پیڈ دانشور تھے اور یہ مضامین ھم ھی لکھواتے تھے،،اس پر ایک اور نوجوان کھڑا ھوا اور بولا ،مگر اس سے کیا ھوتا ھے” بہت کچھ ھوتا ھے ینگ مین،، امریکی نے سنجیدگی سے جواب دیا،،تم خود فیصلہ کرو،جو بائیبل انسانوں کو ایسے احکامات دے جو انسانی فطرت سے متصادم ھوں، جو انسان کو آزادی سے سوچنے،بولنے اور عمل کرنے سے روکتے ھوں،جو لوگوں کو بدبودار اور بے ڈھنگے لباس پہننے، شیو نہ کرنے، دانت گندے رکھنے اور گالی دینے کا درس دیتی ھو،وہ لوگوں کے لئے قابلِ قبول ھو سکتی ھے؟ ھم نے یہی کیا،،این کاؤنٹر کے پلیٹ فارم سے اشتراکی نظریات کے حامل لوگوں کو بے لچک متشدد،اور سخت موقف کے حامی افراد ثابت کر دیا، جس کے بعد تیسری دنیا میں ان لوگوں کے خلاف مزاحمتی تحریکیں شروع ھوئیں اور لوگوں نے اپنے جان و مال اور خون سے ھماری جنگ کو اپنی جنگ سمجھ کر لڑا اور ھمارا کام آسان ھو گیا،،یہاں پہنچ کر پورا ھال تالیوں سے دوبارہ گھونج اٹھا اور بوڑھا امریکی پھر نشست سے اٹھا ھیٹ لہرا کر سامعین کا شکریہ ادا کیا اور اپنی نشست پر بیٹھ گیا،، میں جب بھی کسی ملحد پیج پر جاتا ھوں،، میں جب بھی نوجوانوں ک
و اسلام کے خلاف بولتے سنتا اور لکھتے دیکھتا ھوں،، تو میرا دل خون کے آنسو روتا ھے،، ان نوجوانوں کو ان کے اپنے ھی مولویوں نے اپنی جنت کمانے کے لالچ میں گمراہ کر دیا،، میں جب بھی کسی مولوی کو بہت جزباتی انداز میں دین کا وہ روپ پیش کرتے سنتا ھوں جو کبھی بھی اللہ اور اس کے رسولﷺکےپیشِنظرنہیںتھاتو مجھے وہ بوڑھا امریکی یاد آ جاتا ھے،، یہ لوگ دین کو ناقابلِ عمل ثابت کرنے کے لئے ایڑی چوٹی کا زور لگا رھے ھوتے ھیں،،اور یوں رھتی دنیا تک کے لئے دیئے گیئے دین کو سابقہ دور میں محصور کرنے کی کوشش کرتے ھیں،،، اس حقیقت سے کوئی انکار نہیں کر سکتا کہ اسلام کو جتنا نقصان خود اسلام کے نام پر پہنچایا گیا ھے کوئی غیر یہ نقصان پہنچانے کا سوچ بھی نہیں سکتا تھا،اسلام کے خلاف جتنی نفرت اسلام کے ذریعے پھیلائی گئی ھے،مولوی کو جتنا مولوی کے ذریعے ناقابلِ برداشت بنایا گیا،مدرسے کو مدرسے کے خلاف جس بےدردی سے استعمال کیا گیا اور مسجد کو مسجد کے ذریعے جتنا بدنام کیا گیا،، اتنا ھندؤں،عیسائیوں،اور یہودیوں کی تقریروں اور تحریوں نے پچھلے تین سو سال میں بھی نہیں کیا ! آج ھندوستان کا مسلمان جس سکون اور اطمینان سے مسجد میں نماز پڑھتا ھے اور جس امن اور تحفظ کے احساس کے ساتھ اعتکاف بیٹھتا ھے،،پاکستان والے اس کا تصور بھی نہیں کر سکتے،، اور یہ پاکستان میں مدارس اور مساجد کی مشروم نما بڑھوتری کا تحفہ ھے،، مساجد اور مدارس کھلے اور وسیع ھو گئے ھیں،،مگر ان سے نکلنے والے تنگ نظر اور سخت دل ھو گئے ھیں،، اسلام کا نیا پاکستانی ایڈیشن لوگوں سے وہ اختیار چھین لینا چاھتا ھے جو انہیں ان کے خالق نے عطا کیا تھا،، من شاء فلیومن و من شاء فلیکفر،، اما شاکراً و اما کفوراً کو مسجد کے منبر سے ھی منسوخ کیا جاتا ھے،،اور حشر کے فیصلے اللہ پر چھوڑنے کی بجائے زمین پر کرنے کی رسم کو رواج دیا جا رھا ھے،، کیا کسی کو یہ احساس ھے کہ یہ دعوئ خدائی ھے ؟ جب علماء خدا بن جائیں اور لوگ ان کو خدا مان لیں تو امید کی ھر کرن بجھ جاتی ھے، اور قومیں تاریخ کی دیوار میں،چن دی جاتی ھیں،،اتخذوا احبارھم و رھبانھم ارباباً من دون اللہ !! فیس بک کے استعمال کو حرام کہنے والے اسلام کے دوست نہیں نادان دوست ھیں،، فیس بک ایک نعمت ھے،جسے زحمت کے طور پر بھی استعمال کیا جا سکتا ھے،، جس طرح انکھیں ایک نعمت ھیں جنہیں زحمت کے طور پر بھی استعمال کیا جا سکتاھے،، حرام صرف وھی ھے جسے بقول قاسم بن محمد بن ابوبکر صدیقؓ اللہ نے حرام کے نام کے ساتھ حرام کیا ھے،، باقی کے لئے جائز یا ناجائز کی اصطلاح استعمال کی جا سکتی ھے،، اور جائز یا ناجائز کا فیصلہ انسان کی نیت اور اس کا استعمال کرتا ھے،،اپنی ذات میں کوئی بھی ایجاد حرام نہیں ھے ! ھٰذا ما عندی والعلم عنداللہ،وما علینا الا البلاغ

اگر دینی مدارس میں پڑھے لکھے اور کھاتے پیتےگھرانوں کے بچے بھیجے جائیں تو کیا مدارس کے ماحول اور مساجد کی صورتحال میں کوئی ڈرامائی تبدیلی واقع ھو سکتی ھے؟ کیا وھاں سے فارغ ھونے والا طالب علم روشن خیال ھو سکتا ھے،،روشن خیال سے مراد یہ نہیں ھے کہ وہ صدیوں سے رائج تعلیم کا منکر بن جائے،اسے غلط کہے، یا اس سے ھٹ جائے ،،یہ ایک ناممکن بات ھے،، روشن خیالی کا مطلب قوت برداشت میں اضافہ ،،دوسرے کے لئے گنجائش پیدا کرنا یعنی اس کے دلائل کو جگہ دینا ھے، یعنی ھر مکتبہ فکر کو اکاموڈیٹ کرنا ھے ،، آپ اگر الاتحاد ائیر لائن مین سفر کر رھے ھیں،تو اس کا مطلب یہ نہیں کہ آپ لاؤنج میں ،ائیر بلو اور پی آئی اے والوں سے اپنی ائیرلائن کی خوبیوں اور دوسری ائیر لائن کی خامیوں پر بحث مباحثہ اس حد تک لے جائیں کہ لاؤنج کے اندر ھی دست و گریباں ھو جائیں،، خوبیاں بیان بھی کی جا سکتی ھیں اور خامیاں گنوائی بھی جا سکتی ھیں،،مگر کسی کے ترک و اختیار پر قدغن نہیں لگائی جا سکتی ! اس سوچ کا نام روشن خیالی ھے ! اور اس کے مخالف نقطہ نظر کو تنگ نظری کہا جاتا ھے     !

بعض لوگ بڑے وثوق سے یہ دعوی کرتے ھیں کہ اگر بہتر میٹریل فراھم کیا جائے تو بہترین پراڈکٹ تیار ھو سکتی ھے ،، بہت سارے احباب اس نقطہ نظر سے متفق بھی ھوں گے، مگر میرا تجربہ کچھ اور کہتا ھے،، میرا تجربہ یہ کہتا ھے کہ اگر آپ مدارس کو موجودہ نصابِ تعلیم اور اساتذہ کے موجودہ مائنڈ سیٹ کے ساتھ یورپ کے اے لیول کے بچوں سے بھر دیں تو جب وہ بچہ وھاں سے نکلے گا تو ،اس کے مائنڈ سیٹ  اور فاٹا کے کسی دور دراز گاؤں سے آنے والے اس کے ھم سبق کے مائنڈ سیٹ میں رائی کے دانے کے برابر بھی فرق نہیں ھو گا،، آپ جب کاپی نکالنا چاھتے ھیں تو پیپر کی کوالٹی سے تحریر پر کوئی فرق نہیں پڑتا     !

تفصیل اس اجمال کہ یہ ھے کہ میرے ایک اعزازی شاگرد ھیں،، میرے پڑوس میں پیدا ھوئے،یہاں یو اے ای میں تعلیم مکمل کی ،،پاکستان تشریف لے گئے ، آج تک جتنے ایم اے دریافت ھوئے ھیں سارے ختم کر بیٹھے ھیں جس میں ایم اے انگلش لٹریچر بھی ھے،مجھ سے چیٹ کرتے وقت ان کو اردو اور رومن اردو میں چیٹ کرتے ان کو دقت ھوتی ھے،،،انگریزی کو ترجیح دیتے ھیں، کسی مضمون میں پی ایچ ڈی کی بھی شنید تھی اور دینی تعلیم کے تمام مراحل طے کر کے مفتی بھی بن چکے ھیں ،، ایک انٹرنیشنل یونیورسٹی سے وابستہ ھیں، اور اسلام اباد میں رھائش پذیر،، والدین کے اکلوتے ھونے کی وجہ سے دنیا کی ھر چیز منہ سے نکلتے ھی فراھم کر دی جاتی تھی اور اب بھی صورتحال کچھ ایسی ھی ھے،،ایسا شاندار اور لائق بچہ صرف عمیرہ احمد کے افسانوں میں ھی ملا کرتا ھے،،یعنی 150 پلس کی آئ کیو والا ،،،

مگر اس ساری تعلیم اور ایم ایز کی لسٹ نے اس کا کچھ نہیں بگاڑا،،  روشن خیالی کا یہ عالم ھے کہ لڑکی پسند کر کے، بات چیت کر کے منگنی کا فیصلہ ھو گیا، لڑکی کے والدین کو بتا دیا گیا کہ فلاں تاریخ کو منگنی کرنے آرھے ھیں،تیاری کر لیں،لڑکی والوں نے تیاری کر لی،، مگر یہ منگنی نہ ھو سکی ! کیونکہ اس دوران کہیں سے پتہ چل گیا کہ لڑکی نے الھدی سے کورس کیا ھوا ھے ! بس ساری تعلیم کے اندر سے دولے شاہ کا چوھا نکل کر سامنے آ گیا،،بائی دا وئے اگر اس بچی نے الھدی سے غلطی سے کورس کر لیا ھو گا،تو فرق کہاں پڑا ھو گا؟ لڑکی نے رفع یدین شروع کر دیا ھو گا،، تو مفتی صاحب کے پاس علم تھا،اثر ورسوخ بھی ھوتا تو لڑکی کو قائل کر لیتے،، جو اپنی بیوی کو قائل کرنے کی ھمت نہیں رکھتا،دنیا کو کیا قائل کرے گا؟ آپ جانتے ھوں گے کہ گیرج والا اور مکینک ھر میک اور ماڈل کی گاڑی خرید لیتے ھیں کہ میں خود مکینک ھوں ،،بنا لوں گا،،ان مفتی صاحب سے وہ مکینک زیادہ دلیر اور پر اعتماد ھوتا ھے،،یہ ھمارے مدارس کی پراڈکٹ تھی ،حالانکہ میٹریل بہت اعلی تھا   !

میرے دوست کے بچے ھیں،، امریکہ میں پیدا ھوئے، امریکن نیشنل ھیں، النہدہ اسکولز میں پڑھے ھوئے ھیں،، والد صاحب رئیس المھندسین ھیں،، پورا گھرانہ تعلیمیافتہ ھے،، دادا جان  سے لے کر تایا تک،، میں نے مشورہ دیا کہ پاکستان کے مدارس کا ماحول ذرا تنگ نظر ھے، بچوں کو ساؤتھ افریقہ بھیج دیں ،، دونوں بچے ساؤتھ افریقہ سے 7 سال لگا کر آ گئے،، رمضان کا مہینہ تھا،، افطار پارٹی کے بعد فارغ ھو کر نمازِ مغرب کے لئے جا رھے تھے، رستے میں سڑک کراس کرتے ھوئے،کسی موضوع پر بات چل رھی تھی تو مولانا مودودیؒ کا ذکر ھوا،، بڑے بھائی نے فوراً فتوی دیا کہ مودودی کوئی عالم تھا، وہ تو گمراہ آدمی تھا،، میں تو سڑک کے بیچوں بیچ کھڑے کا کھڑا رہ گیا،اگر دوسرا آدمی دھکا نہ دیتا تو مین گاڑی کے نیچے آ گیا ھوتا !

اس کا مطلب یہ ھوا کہ اس نصاب تعلیم اور اس تنگ نظری کے حامل اساتذہ کے زیر نگرانی مدارس آپ لندن،واشنگٹن،نیو یارک یا جوھانسبرگ میں بنا لیں اور کتنی ھی پڑھی لکھی فیملی کا بچہ ان کے حوالے کر دیں وہ آپ کو ایسا ھی ایک تنگ نظر عالم تیار کر کے پکڑا دیں گے جو سب سے پہلے اپنے والد کی گمراھی کا فتوی دے گا ،،

یہ ایسی حقیقت ھے جس سے کوئی مفر نہیں ھے،،  اور اس کو بدلنے کی بجائے اس کے ساتھ جینا سیکھنا پڑے گا،، شوگر کی بیماری کی طرح یہ دائمی مرض ھے،، یہ ھاسپٹل ڈیزیز ھے جو ڈاکٹروں اور پیرا میڈیکل اسٹاف کو لگتی ھے،،یہ تنگ نظری کا مرض مدارس کا مرض ھے جو اساتذہ اور طلباء کو لگتا ھے،، علاج اس لئے مشکل ھے کہ یہ قران و حدیث پڑھ پڑھ کر ھی تو بھرا جاتا ھے !