میرا بے پرواہ ، بے نیاز مولا

ھم اللہ کی تخلیق ھیں ، اس کی سوچ اور اس سوچ کی ڈیویلپ شدہ تصویر ھیں ، اللہ ھمارا اور پوری کائنات کا مصور ھے ، خالق کے سامنے مخلوق اور مصور کے سامنے تصویر کے کوئی حقوق نہیں ھوتے ، جب چاھے جس طرح چاھے اس تصویر کو مٹا دے ،جلا دے یا پھاڑ دے کوئی اس پہ اعتراض نہیں کر سکتا ،، لا یُسئل عما یفعل ، وہ جو چاھے کرے اس سے کوئی سوال نہیں کر سکتا ،، یفعل ما یشاء ،، جو چاھتا ھے کرتا ھے اور جو کرتا ھے وہ عدل ھوتا ھے ،اس کے کسی فعل میں کوئی نقص و عیب نہیں ،جسے ھدایت دیتا ھے عدل سے دیتا ھے اور جسے بھٹکنے دیتا ھے عدل کی بنیاد پر بھٹکنے دیتا ھے -اس کے کسی فعل پر ” کیوں ” لاگو نہیں ھوتا ،، اس کے کسی وعدے پہ ” کیسے کا اطلاق نہیں ھوتا -ھم عبادت کے لئے پیدا کیئے گئے ھیں اور عبادت ھماری غایتِ تخلیق ھے ، ھماری عبادت اس کی ضرورت نہیں بلکہ ھمارا فرض ھے ،، اس کی محبت ھم پر قرض ھے ،، کائنات میں انسان سے بڑھ کر اس کو کوئی جان نہیں سکتا ،، آسمان والے بھی اس کی تلاش میں سر اٹھائے سر گرداں ھیں ،، مومن کو جب بھی وہ ملا ھے اپنے اندر سے ملا ھے ،، جب سے انسان نے اپنے دل کو بھول کر اس کی تلاش کا سفر شروع کیا ،، اس کا سفر طویل سے طویل تر ھو گیا ،،،،،، وہ رب کو بھولا تو رب نے اسے اپنا آپ بھلا کر ،،،،،، اپنی ذات تک رسائی کا دروازہ ھی بند کر دیا ،،
اپنے دل کو بھول کر سارا جہاں ڈھونڈا کیئے !
تم کہاں بیٹھے ھوئے تھے، ھم کہاں ڈھونڈا کیئے !!
؎ تن تیرا رب سَچے دا حجرہ ، پا اندر ول جھاتی !
نہ کر منت خواج خضر ، تیرے اندر آبِ حیاتی !
اللہ نے اپنی محبت کی مثال ماں کی محبت سے دی ھے ،، اپنی ذات کی مثال ماں کی ذات سے نہیں دی ،، ماں کے بالمقابل ھمارے حقوق ھیں مگر اللہ کے بالمقابل ھمارے کوئی حقوق نہیں ھیں ،، ھم اور ھمارا سب کچھ اسی کا ھے ،، ھمارا وجود اور ھماری صلاحیتیں اس نے ھمیں نہ تو بیچی ھیں اور نہ ٹھیکے پر دی ھیں ،، ھم ھر وقت ھر لحظہ اس کی ملکیت ھیں ،جیسے چاھے تصرف فرمائے ،، جب چاھے جس دل پہ چاھے تالا لگا دے ،، جب چاھے اس کی ایکسٹینشن کا ارادہ فرما لے ، جب چاھے اسے ڈھا دے ،،
مگر اللہ عادل ھے ، ظلم کو اس نے اپنی ذات پہ خود حرام کر دیا ھے وہ کافروں پہ بھی ظلم نہیں کرتا کافر خود اپنے اوپر ظلم کرتے ھیں ،، وما ظلمھم اللہ ولٰکن کانوا انفسھم یظلمون ،، ان اللہ لا یظلم الناس شیئاً ،،، کافر بھی بے فکر ھو جائیں اللہ ان پر بھی ذرہ برابر ظلم نہیں کرے گا ،، وہ بلا تعصب سب کا خالق اور سب کا رب ھے ،،